Tgira ed assistenza
La dignitad e l’individualitad stattan tier nus el center. Nus prendin temps per nossas cussadentas e nos cussadents e respectein els sco persunalitads autonomas. Nus essan pertscharts ch’igl ei buca sempel da seconfidar a mauns jasters suenter haver viviu biars onns a moda independenta. Per quei motiv lavuran tier nus sulettamein persunas dil fatg cun experientscha che han il sensori necessari per ils basegns da nossas cussadentas e da nos cussadents. Nus havein in stretg contact cun ils miedis da casa locals, cun fisioterapeutas ed ergoterapeuts ed en cass da basegns era cun il spital regiunal a Glion. Per habitontas dementas e habitonts dements purschin nus ina tgira ed assistenza speciala conforma a lur basegns en in spazi protegiu che dispona d’ina gronda terrassa segira cun curtgin.
Dimora pli liunga
Nus discurrin dalla tgira da liunga durada, sche la dimora cuoza pli ditg che quater jamnas. La finamira dalla tgira da liunga durada ei da mantener las habilitads corporalas e spirtalas. Grazia alla tgira activonta vegnan las cussadentas ed ils cussadents involvi aschi bein sco pusseivel ellas activitads dil mintgadi sco selavar, setrer en e magliar. Era la tgira medicinala gioga ina rolla centrala ella tgira da liunga durada per saver sustener il meglier pusseivel la sanadad ed il beinstar.
Dimora da vacanzas
Ina dimora da vacanzas sa survir sco sligiaziun transitoria denter la dimora en spital ed il retuorn a casa. Igl ei denton era ina pusseivladad per persunas che tgiran lur confamigliars da far ina pausa bein meritada.
Tgira duront il di e la notg
Persunas che tgiran lur confamigliars ein savens suttamessas ad in grond squetsch. Ton pli impurtont eis ei per ellas da saver far regularmein ina pausa per rimnar nova forza. La tgira duront il di e la notg ha precis quei intent.
Dalla tgira duront il di san ins profitar mintga di ni certs dis dall’jamna denter las 9.00 e las 17.00. La tgira duront la notg stat a disposiziun mo, sche nus havein avunda capacitads da letgs.
Activaziun
Duront il di purschin nus activitads ed occupaziuns variontas. Nus procurein che nossas cussadentas e nos cussadents restien activs e che lur habilitads persunalas vegnien promovidas. Seigi quei duront cantar ella gruppa, cun dar troccas, far gimnastica ni zambergiar creativamein – nossas habitontas e nos habitonts han differentas pusseivladads per concepir il di a moda raschuneivla ed emperneivla.
«Ei gioga negia rolla con plaun che Vus meis, aschiditg che Vus steis buc eri.» Confuzius
